好啦！終於講到法國嘅黑人球員。

首先，我哋要分非洲黑人同其他法國海外省（自治地）黑人。法國以前喺非洲擁有大量殖民地，集中喺非洲西北一帶（科特迪阿、塞內加爾、乍得、加蓬、喀麥隆等主要國家）及馬達加斯加。我又講多少少，香港有位學者叫雷競璇，佢後生時曾經負笈到巴黎攻讀黑非洲政治，呢個學科可以話係法國治理殖民地嘅「知庫」（介紹佢兩本書：《窮風流》、《據我所知》，好睇的。有機會的話我都想介紹呢位學者，佢都有研究古巴在地華人及後裔）。

呢啲球員好多都擁有代表法國隊資格。我好老實咁講，如果唔係對出生地（血緣）國家有效忠感情，好多都會選擇較強、or多機會出場嘅一方為代表出席比賽。Evra及Vieira就係塞內加爾出世，但選擇代表法國；Makelele 就係生於剛果民主共和國，不過可能該國實力一般，所以揀效力法國國家隊；Desailly 就係加納誕生。單單由1998年冠軍至2006年亞軍呢段法國隊盛世，非洲嘅前殖民地出生球員就貢獻不少骨幹成員。

不過黑皮膚嘅球員未必一定出生於非洲，而且法國係歷史悠久殖民地帝國，其他洲都擁有過統治地，好似美洲、印度洋、東南亞及大洋洲都有大量殖民地。

咁我講下呢啲地方有乜法國國腳。Guadeloupe呢個法國海外省，就位於中南美洲嘅群島，有讀法文嘅朋友會知呢個地方，因為教材一定有講：呢個地方都係用歐羅的。有Thuram、Henry、Gallas（以上球員一係出生該地or一係有血統）。喺加勒比海有西印度群島，其中有一個地方叫馬提尼克，都係屬於法國一部分，Wiltord就係嚟自呢度。

法屬圭亞那呢度除咗係太空火箭發射基地之外，仲係法國殖民地，有Malouda呢位球員。

去到大洋洲嘅新喀里多尼亞，呢個法國喺太平洋嘅海外構成部分（類似自治省咁），Karembeu呢位球員（佢外貌相當狂野但老婆就幾正）擁有新喀里多尼亞血統。

仲有啲係無入選到、但喺職業球會搵食嘅「不同血統不同族裔嘅法國人」，因為太多，不一一列舉。

大家下次睇法國隊比賽，可以講「Allons-y Les bleus」打氣。熟悉法國足球嘅朋友，都會聽過「克萊楓丹青訓」呢個大名，但真係出產嘅成才球星唔係幾多，相比職業球會的青訓，係有一啲問題。可能大家會話亨利、安歷卡、甚至麥巴比，都係呢度出嚟。但亦都錯過一啲球員，好似基士文（佢有日耳曼血統,睇佢個姓就知）同普巴（大家留意下前三位球員出名快，之後兩名球員以技巧著名）。呢個青訓計劃資源來自法國政府，好正常係為培養「法國人才」，但好可惜有好多呢個計劃的球員，成才之後係選擇代表其他國家。

咁點解會發生呢個現象？就係克萊楓丹學院選才基準係好量化，根據一啲體格、速度、及成長預期參數選拔。喺呢種數據化下揀人，黑人球員有先天優勢，而黑人球員本身就已經有資格代表其血緣國，咁就出現呢種成才為他國效力的情況。法國隊其中一任主帥Blanc（佢係1998年冠軍「白人」隊長）就私底下講過，要限制30%非洲裔選手入讀克萊楓丹，以保障人才流失。咁呢種政策就一定遭到「左翼（費時用嗰『膠』字）形容」狂插。

我喺度問大家問題：一個國家用公帑去培訓人才，但到頭來人才外流，值唔值得？其次限制某族裔人才入選，咁唔達標準嘅其他族群就因此入選，之後會拉低整體實力，導致計劃失敗。如果大家係呢個計劃負責人又會點應對呢？ 一個國家（隊）嘅強大，靠狹窄嘅人才係唔能夠達到。但點樣係五湖四海入面，凝聚其心及實力，不止於空有外殼，就好靠軟實力去維繫。有會員講到用名宿（有識之士）去帶領球隊（國家），磨鍊成一隊強隊。呢個係其中一個方法，但唔係唯一方法。一隊足球隊（國家）強盛，係要漫長嘅培訓、良好的環境、有識之士出現去帶領，先有機會一爭榮光。

今次篇幅又好長，下期繼續講。

▶️ 蕭少滔：習近平分化歐洲之行，為何法國、德國、匈牙利、塞爾維亞各懷鬼胎，但歐盟整體卻處於上風？
https://www.youtube.com/watch?v=cOhaaz98F3M