繼續讀者黎先生的分享，開始進入他的皇仁舊生祖父的戰時悲慘回憶部份： // 四二年春開始，好多細路女同老人家就咁俾屋企人抌低喺青山道一帶，啲老人家帶住細路女等人買。由賣變拎，去到四二年夏根本冇人會拎細路女，更唔好話拎埋返大陸，連老鴇都唔要佢哋。 每個老人家最少帶住一個細路女，可以話等於喺度聽餓死。 所以每次有人行近我附近，我都會分啲準備好嘅餅比佢哋，每次都有幾個老人家求我：「要咗我個孫！」 最初我個心都係躺住血，但之後真係慢慢麻木咗。 當時我心裏面諗：我屋企一家十口仲點樣養呀？ 有時見到啲咁得意嘅細路女，真係想拎一個返去！ 橫掂屋企都係得壹個女。 但好快我都唔需要去九龍做嘢，最後呢啲念頭就好似流星一樣咁… 當時會社入邊嘅氣氛，其實同先前比起，只係緊張咗少少，主要係嚟自皇軍下達指令嘅壓力，隨住之後民政官由文官上任，情況改善咗好多。亦都多得呢班磨蕊出現，我哋對於戰況會多啲了解，因為佢係比較支持我哋呢一邊，至少喺工作呢一方面。 會社氣氛好和諧，因為就算去到戰爭後期，根本冇乜嘢議和派、主戰派，海軍派、陸軍派。我哋都只係服從命令，我哋只不過係一班日本人，一班商人，一班買辦，一班社員，更何況我只係一個喺日本公司做嘢嘅中國人。 公司入面嘅工作內容好無聊，因為貿易根本唔多，每次最緊張嘅只係船期準唔準。 係去到四四年，我哋好多商船根本就進出唔到，咁工作內容主要得番陸路嘅貿易。貨物只係以食物同煤炭為主，日本進口嘅日式日用品已經近乎冇曬，而轉口貿易都幾乎停頓...... // ▶️ 日本文化協會榮休副校長侯清儀：悲慘亡靈：戰前香港的日本妓女（四） https://www.youtube.com/watch?v=DVC8-0IxrVk