教授你好，有少少想分享。體育是政治的延伸，奧運永遠都不會沒有政治議題。最近就係延續了奧運開幕禮的性別議題爭議。 性別驗証（Sex verification）係現代、尤其是依幾年嘅體育比賽其中一個有爭議嘅地方。 針對一個運動員去睇件事，會受太多因素影響，要抽空所有背景，用制度去審視運動員嘅性別先至係公平。當然可以話所有制度都有唔公平，但係如果唔用一個制度嘅話，就只會更加唔公平。 究竟可以用乜嘢方法？ 1. 身份證 基本上冇可能，因為呢啲文件都係國家提供，參賽國家絕對有利益衝突。 2. 出生性徵 呢個係傳統做法，但係咁樣嘅話，就會誤判一啲因為天生變異而令器官發育不完全嘅人。 3. 現時性徵/外表 可以通過整型手術改變，但並不一定會影響荷爾蒙水平。而且咁樣會容易造成針對外貌嘅批評。 4. 染色體 睇落係公平，但係咁樣就會令到XXY染色體嘅人冇得參加比賽。而且喺進步思潮之下，咁樣嘅宿命論未必令到所有人接受，性別自決都係近依幾年好大嘅問題。而且有啲特定嘅情況之下，XY染色體嘅胚胎，都可能發展成為有女性生殖器和结構的個體。 5. 睾丸酮水平 好似公平，因為大部份運動都係靠肌肉，而睾丸酮確實係會促進肌肉生長，令爆發力都有提升。「正常」男女嘅睾丸酮水平存在倍數上嘅分別，唔存在含糊嘅地方。（當然如果睾丸酮嘅水平高過平均女性水平，但係低過平均男性水平嘅話，究竟應該參加邊一個組別，又要討論。）不過睾丸酮水平係可以因為藥物而改變，如果一個男性食藥，令到睾丸酮水平下降，咁佢係應該參加男子組定女子組？ 6. 睪丸酮水平窗口 可以制定一個時間，例如兩年。喺呢段時間之內，都必須維持正常女性嘅睾丸酮水平，先可以參加女性組別比賽。你可以話咁樣夠公平，都已經有幾年嘅時間維持低睾丸酮水平，就應該同其他女選手差唔多啦？但如果一個運動員喺發育期用男性身體訓練，骨架同肌肉纖維已經達到男性發育嘅水準，之後接受減少睾丸酮治療，幾年嘅時間，足唔足以將之前嘅訓練成果沖洗走？呢一個都需要考慮。青春期時用男性嘅身體訓練，又會得到不公平嘅優勢。咁樣，你話如果喺青春期之前，就完成資料得唔得？咁樣又會返返去第一個問題，就係「邊個知道啊？」而且需要幾多年，去維持呢一個睪丸酮水平，先可以參加女子組別比賽，又係需要永恆爭拗嘅問題。 令到問題再複雜啲嘅就係唔同項目、唔同嘅體育組織用嘅標準唔一定一樣，咁樣就可能會出現今次嘅問題，在一個組織受到接納嘅運動員，可能係另外一個組織不被接納。咁樣係公平，定係對運動員嘅傷害？ 而且接受性別檢驗嘅運動員，要背負好多來自社會、朋輩嘅心理壓力。檢驗嘅方法同公開結果，亦都可能對運動員造成私隱嘅侵害。 不幸嘅係今次係奧運會出現呢件事。民族情感、政府操作、網絡輿論都同一直以來嘅覺醒運動、女權運動、LGBTQIA2S+、甚至乎選舉都拉上關係。睇唔到可以到一個可以一勞永逸嘅解決方法。 ▶️ 性別研究博客雅培：烏克蘭戰爭的陽剛與陰柔：女兵、同志兵、跨性別士兵得到應有尊嚴嗎？https://www.youtube.com/watch?v=3R9kTSxUZ3Y