沈教授及各位會員好，我哋繼續傾球員嘅國藉呢個話題。上期講到父子兄弟代表唔同國家出戰，今次我哋集中講下法國唔同球員代表法國國家隊出戰嘅事情。

有會員益友提及過，類似「一個國家隊入面有不同族裔、或同該國家無血緣無殖民關係嘅球員」。首先，我哋要理解民族國家（nation states）只不過係世界上其中一種國家模式，仲有聯邦、邦聯（United States）、或部落合組國家等不同型式。所以好多國家入面係有不同持分者。

我哋講下法國先。

好多人都知法國係一個老牌殖民帝國，足球隊應該好早有不同膚色球員參與。其實，黑膚色球員佔主力地位始於八十年代，當時就有Trésor和Tigana兩位主力，不同現今嘅法國國家隊，黑膚色已經佔據四分三。

但大家唔好以為白皮膚就係純法國人。喺好早嘅年份，已經有法國殖民地出身嘅球員：Fontaine（喺1958年嗰屆世界盃射入13球）呢位出身摩洛哥（喺北非嗰個唔係摩納哥），就係殖民地出產嘅代表。咁早期嘅法國隊除咗有殖民地貢獻外，仲有係其他歐洲國家嘅移民後代。當時法國經歷過一次同二次大戰，本土勞動人口不足，會引入周邊國家補充勞動力，有比利時、西班牙甚至波蘭。咁除咗勞動人口外，法蘭西一直都係大愛國家（法國大革命後提倡嘅自由、博愛、平等），咁一定會收納政治難民。咁其後代，都會有鍾意踢足球然後成名的。

其他族裔代表法國隊有以下例子：Kopa、Koscielny（波蘭裔） 、Luis Fernandez、Lizarazu及Deschamps（前者西班牙裔，後兩者直情係巴斯克人），以上係較淺膚色嘅球員。我想講多一個比較有興趣嘅球員，就係Youri Djokareff，佢都係1998年冠軍主力成員，其父都係足球員。大家仔細睇下其外貌，有啲中亞人輪廓，佢阿爺就係Kalmyk人，呢個種族係蒙古混歐亞一支（列寧都係有呢一個血緣）。

我哋都未講到黑人球員，法國隊已經有咁多不同人員構成了。

現在到講下非洲嗰邊球員來源，唔好心急黑人住（u try the black, u never get back），講非洲都仲有北非嗰一帶。摩洛哥、阿爾及利亞同突尼西亞都曾經係法國殖民地，都係50年代脫離法國解殖，呢三個地方都供應過法國國家隊球員。咁有啲係法國為宗主國時期出生及成長該地嘅法國人（同英國殖民地差不多情況），其次有啲係混血當地人，有啲就係移民到法國嘅後人。Zidane同Benzema就係有阿爾及利亞血統，祖父輩都係由該地移居到法國本土，然後喺法國出生成長。Walid Regragui呢位前摩洛哥國腳兼該現任國家隊教練，就係另一個相反，佢喺法國出生、兼長期喺法國聯賽效力，可能係法國隊人才濟濟，就選擇代表摩洛哥出戰。呢三個國家隊成員仲白過現今法國隊。（笑）

*題外話：Camus（卡繆）呢位哲學家反而係祖父輩移居到阿爾及利亞，然後佢喺當地出世及成長嘅法國人，之後才到法國發展其事業。

（待續）

▶️ 蕭少滔：習近平分化歐洲之行，為何法國、德國、匈牙利、塞爾維亞各懷鬼胎，但歐盟整體卻處於上風？
https://www.youtube.com/watch?v=cOhaaz98F3M